ឯកឧត្តម លី ច័ន្ទតុលា ប្រធានគណៈមេធាវីនៃព្រះរាជាណាចក្រកម្ពុជា បានអញ្ជើញជាអធិបតីក្នុងកិច្ចពិភាក្សាស្តីពី «ហ៊ីប៉ូតែក» រៀបចំដោយគណៈមេធាវីនៃព្រះរាជាណាចក្រកម្ពុជា នៅមណ្ឌលសិក្សាបច្ចេកទេសធនាគារ

នាថ្ងៃអង្គារ ៩កើត ខែស្រាពណ៍ ឆ្នាំរោង ឆស័ក ព.ស.២៥៦៨ ត្រូវនឹងថ្ងៃទី១៣ ខែសីហា ឆ្នាំ២០២៤ ឯកឧត្តម លី ច័ន្ទតុលា ប្រធានគណៈមេធាវីនៃព្រះរាជាណាចក្រកម្ពុជា បានអញ្ជើញជាអធិបតីក្នុងកិច្ចពិភាក្សាស្តីពី «ហ៊ីប៉ូតែក» ដែលរៀបចំដោយគណៈមេធាវីនៃព្រះរាជាណាចក្រកម្ពុជា នៅសាលប្រជុំជាន់ទី៣ នៃមណ្ឌលសិក្សាបច្ចេកទេសធនាគារ។ កិច្ចពិភាក្សានេះ មានការអញ្ជេីញចូលរួមថ្លែងសុន្ទរកថាបើកកិច្ចពិភាក្សាដោយ ឯកឧត្តម លី ច័ន្ទតុលា ប្រធានគណៈមេធាវីនៃព្រះរាជាណាចក្រកម្ពុជា ដោយមានការចូលរួមពីមេធាវីក្នុងវិស័យធនាគារ និងសារការី សរុបចំនួន ៧១នាក់។ ឯកឧត្តមប្រធានគណៈមេធាវី បានបញ្ជាក់ថា គណៈមេធាវីនៃព្រះរាជាណាចក្រកម្ពុជា រៀបចំកិច្ចពិភាក្សានេះឡើង ក្នុងគោលដៅលើកឡើងនូវបញ្ហាប្រឈមដែលជួបប្រទះញឹកញាប់នៅក្នុងការអនុវត្ត ទាក់ទងនឹងហ៊ីប៉ូតែក ដោយធ្វើការបង្ហាញពីទិដ្ឋភាពទូទៅលើផ្លូវច្បាប់ដែលពាក់ព័ន្ធ ហើយបើកឱ្យមានកិច្ចពិភាក្សាពីបណ្តាអ្នកច្បាប់ដែលជាមេធាវីក្នុងវិស័យធនាគារ និងសារការី។ ឯកឧត្តមប្រធានគណៈមេធាវី ក៏បានថ្លែងអំណរគុណយ៉ាងជ្រាលជ្រៅចំពោះធនាគារជាតិនៃកម្ពុជា ដែលបានសហការផ្តល់ជូននូវការប្រើប្រាស់សាលប្រជុំជាន់ទី៣ នៃមណ្ឌលសិក្សាបច្ចេកទេសធនាគារ ដល់គណៈមេធាវីក្នុងការរៀបចំកិច្ចពិភាក្សានេះ។ ឯកឧត្តមប្រធានគណៈមេធាវី មានការរំពឹងទុកខ្ពស់ចំពោះកិច្ចពិភាក្សាមួយនេះ ថានឹងអាចឱ្យបុគ្គលពាក់ព័ន្ធស្វែងយល់កាន់ច្បាស់អំពីបទប្បញ្ញតិ្តច្បាប់ តាមរយៈការពិភាក្សាគ្នាយ៉ាងផុសផុលរបស់អ្នកចូលរួមទាំងអស់គ្នា ដើម្បីឱ្យការអនុវត្តច្បាប់ពាក់ព័ន្ធនឹងហ៊ីប៉ូតែកនេះ កាន់តែល្អប្រសើរ ឈានទៅរកការឯកភាពគ្នាក្នុងការបកស្រាយច្បាប់ និងកាត់បន្ថយឱ្យបានជាអតិបរមានូវបញ្ហាប្រឈមក្នុងការអនុវត្ត។

គណៈមេធាវីនៃព្រះរាជាណាចក្រកម្ពុជា ⏬ JOIN!

B1 454947348 1018905446695343 383244740522806026 n