ពិធីបិទ និងការប្រគល់ពាន់រង្វាន់កម្មវិធីការប្រកួតវាយសីពានរង្វាន់គណៈមេធាវីកម្ពុជាលើកទី៣ និងការប្រកួតមិត្តភាពអន្តរជាតិពានរង្វាន់គណៈមេធាវីកម្ពុជាក្រោមអធិបតីភាពដ៏ខ្ពង់ខ្ពស់ ឯកឧត្ដម លី ច័ន្ទតុលា ប្រធានគណៈមេធាវីនៃព្រះរាជាណាចក្រកម្ពុជា

ថ្ងៃអាទិត្យ ១៣រោច ខែស្រាពណ៍ ឆ្នាំរោង ឆស័ក ពុទ្ធសករាជ ២៥៦៨ ត្រូវនឹងថ្ងៃទី១ ខែកញ្ញា ឆ្នាំ២០២៤ ឯកឧត្ដម លី ច័ន្ទតុលា ប្រធានគណៈមេធាវីនៃព្រះរាជាណាចក្រកម្ពុជា បានចូលរួមជាអធិបតីភាពដ៏ខ្ពង់ខ្ពស់ និងថ្លែងសុន្ទរកថាបិទក្នុងពិធីបិទនិងការប្រគល់ពាន់ក្នុងកម្មវិធីការប្រកួតវាយសីពានរង្វាន់គណៈមេធាវីកម្ពុជាលើកទី៣ និងការប្រកួតមិត្តភាពអន្តរជាតិពានរង្វាន់គណៈមេធាវីកម្ពុជាដែលប្រារព្ធធ្វើនៅទីលានវាយសី T (T-Badminton Court)។ នៅក្នុងឱកាសដ៏វិសេសវិសាលនេះឯកឧត្ដមប្រធានបានវាយតម្លៃកម្មវិធីប្រកួតរយៈពេលពេញចំនួន ៣ ថ្ងៃ មកនេះកម្មវិធីប្រកួតប្រព្រឹត្តទៅដោយរលូន និងជោគជ័យប្រកបដោយស្មារតីកីឡា មិត្តភាព និងការគោរពគ្នាទៅវិញទៅមករវាងគ្រប់កីឡាករ និងអ្នកចូលរួមទាំងអស់ ក្រោមបរិយាកាសសប្បាយរីករាយ និងសម្លេង ស្រែកហូរកញ្ច្រៀវរបស់អ្នកគាំទ្រ។ ឯកឧត្ដមប្រធានបានបញ្ចាក់ផងដែរថា ភាពជោគជ័យនៃការរៀបចំកម្មវិធីប្រកួតវាយសី ក្នុងក្របខ័ណ្ឌគណៈមេធាវី និងមិត្តភាពអន្តរជាតិនេះ សបញ្ជាក់ឱ្យឃើញអំការពីឯកភាព រវាងគ្រប់ភាគីពាក់ព័ន្ធ និងស្ថាប័ន្ធវិជ្ជាជីវៈជាតិ និងអន្តរជាតិ លើសារៈសំខាន់របស់កីឡាក្នុងវិជ្ជាជីវៈមេធាវី ហើយចាត់ទុកកីឡាជាមធ្យោបាយមួយក្នុងការលើកកម្ពស់សុខុមាលភាព របស់ មេធាវី និងភ្ជាប់ទំនាក់ទំនងរវាងមេធាវីពីតាមបណ្តាប្រទេសផ្សេងៗគ្នា ក៏ដូចជាការរឹតចំណង មិត្តភាព រវាងស្ថាប័នគណៈមេធាវីជាតិ និងអន្តរជាតិផងដែរ។ លើសពីនេះទៅទៀតឯកឧត្ដមប្រធានបានលើកឡើងថាការប្រកួតវាយសីពានរង្វាន់គណៈមេធាវីកម្ពុជាលើកទី៣ និងការប្រកួតមិត្តភាពអន្តរជាតិពានរង្វាន់គណៈមេធាវីកម្ពុជា នេះបានបង្កើតឱ្យមានចំណុចចាប់ផ្តើមមួយសម្រាប់ការរៀបចំការប្រកួតកីឡាសម្រាប់វិជ្ជាជីវៈ ដើម្បីធានាថាសុខុមាលភាពទាំងផ្លូវកាយ និងផ្លូវចិត្តរបស់មេធាវីត្រូវបានយកចិត្តទុកដាក់ជាប្រចាំ និងដើម្បីពង្រឹងកិច្ចសហប្រតិ្តការរវាងស្ថានប័នវិជ្ជាជីវៈនានានៅក្នុងតំបន់ផងដែរ។ ជាមួយគ្នានេះផងដែរឯកឧត្ដមប្រធាន ក៏ថ្លែងអំណរគុណយ៉ាងជ្រាលជ្រៅជូនចំពោះវត្តមានសហភាតាជាតិ និងអន្តរជាតិទាំងអស់ដែលបានឆ្លៀតពេលពីការងារដ៏មមាញឹក និងចំណាយធនធានពេលវេលាដ៏មានតម្លៃក្នុងការធ្វើដំណើរចូលរួមក្នុងកម្មវិធីប្រកួតនេះ។ ជាការឆ្លើយតប សហភាតាជាតិ និងអន្តរជាតិបានថ្លែងអំណរគុណយ៉ាងជ្រាលជ្រៅជូនចំពោះគណៈមេធាវីកម្ពុជា ជាពិសេសឯកឧត្ដមប្រធាន ដែលបានទទួលបដិសណ្ឋារកិច្ចស្វាគមន៍យ៉ាងកក់ក្តៅបំផុតជូនចំពោះវត្តមានរបស់ពួកគេ ដោយបានកោតសរសើរ និងចូលរួមអបអរសារទជូនចំពោះឯកឧត្ដមប្រធានដែលបានដឹកនាំកម្មវិធី “ប្រកួតវាយសីពានរង្វាន់គណៈមេធាវីកម្ពុជាលើកទី៣ និង ប្រកួតមិត្តភាពអន្តរជាតិពានរង្វាន់គណៈមេធាវីកម្ពុជា” ប្រកបដោយភាពជោគជ័យយ៉ាងត្រចះត្រចង់។ គួរបញ្ជាក់ផងដែរថា កម្មវិធីប្រកួតវាយសីពានរង្វាន់គណៈមេធាវីកម្ពុជាលើកទី៣ និង ប្រកួតមិត្តភាពអន្តរជាតិពានរង្វាន់គណៈមេធាវីកម្ពុជា មានការអញ្ជើញចូលរួមពីសហភាតាមេធាវីពីបរទេសសរុបចំនួន ៧០ នាក់ ដែលក្នុងនោះ មានកីឡាករវាយសីចំនួន ៤២ នាក់ ត្រូវនឹង ២១ គូរមកពីបណ្តាប្រទេសចិន តំបន់រដ្ឋបាលពិសេសហុងកុង ប្រទេសថៃ ប្រទេសឥណ្ឌា និងប្រទេសជប៉ុន។ ក្រៅពីកីឡាករវាយសីក៏មានកីឡាករ បាល់ទាត់មួយក្រុមពីគណៈមេធាវីនៃរដ្ឋបុមបេ ប្រទេសឥណ្ឌាផងដែរ។ លើសពីនេះទៅទៀតយើងមានសហភាតាសរុបចំនួន ១៥៨ នាក់ បានចុះឈ្មោះចូលរួមក្នុងកម្មវិធីប្រកួតនេះនៅក្នុងប្រភេទពានរង្វាន់ផ្សេងៗទៀតដែលរៀបចំដោយអនុគណៈកម្មការកីឡាវាយសីគណៈមេធាវីកម្ពុជា។

គណៈមេធាវីនៃព្រះរាជាណាចក្រកម្ពុជា ⏬ JOIN!

• មុន
• បន្ទាប់