គណៈមេធាវីនៃព្រះរាជាណាចក្រកម្ពុជា និងក្រសួងវប្បធម៌និងវិចិត្រសិល្បៈ បានរៀបចំសិក្ខាសាលាពិគ្រោះយោបល់លើសេចក្តីព្រាងវិសោធនកម្មច្បាប់ស្តីពី  «សិទ្ធិអ្នកនិពន្ធនិងសិទ្ធិប្រហាក់ប្រហែល» នៅទីស្នាក់ការគណៈមេធាវី

នាថ្ងៃព្រហស្បតិ៍ ៥កើត ខែភទ្របទ ឆ្នាំម្សាញ់ សប្តស័ក ព.ស.២៥៦៩ ត្រូវនឹងថ្ងៃទី២៨ ខែសីហា ឆ្នាំ២០២៥ គណៈមេធាវីនៃព្រះរាជាណាចក្រកម្ពុជា សហការជាមួយក្រសួងវប្បធម៌និងវិចិត្រសិល្បៈ បានរៀបចំសិក្ខាសាលាពិគ្រោះយោបល់លើសេចក្តីព្រាងវិសោធនកម្មច្បាប់ស្តីពី «សិទ្ធិអ្នកនិពន្ធនិងសិទ្ធិប្រហាក់ប្រហែល» ក្រោមអធិបតីភាពរបស់លោកមេធាវី សាំង វណ្ណៈ ប្រធានគណៈមេធាវីនៃព្រះរាជាណាចក្រកម្ពុជា និងឯកឧត្តម ឡុង ប៉ុណ្ណាស៊ីរីវត្ថ រដ្ឋលេខាធិការ តំណាងដ៏ខ្ពង់ខ្ពស់លោកជំទាវបណ្ឌិតសភាចារ្យ ភឿង សកុណា រដ្ឋមន្ត្រីក្រសួងវប្បធម៌និងវិចិត្រសិល្បៈ។ ជាកិច្ចចាប់ផ្តើមនៃសិក្ខាសាលា លោកប្រធានគណៈមេធាវី និងឯកឧត្តម រដ្ឋលេខាធិការ ព្រមទាំងអង្គសិក្ខាសាលាទាំងមូលបានចូលរួមគោរពវិញ្ញានក្ខន្ធនៃវីរកងទ័ពកម្ពុជាគ្រប់ៗរូបដែលបានពលីជីវិតក្នុងសមរភូមិដើម្បីការពារបូរណភាពទឹកដីជាតិមាតុភូមិកម្ពុជា។ គោលបំណងនៃការរៀបចំសិក្ខាសាលាពិគ្រោះយោបល់ត្រូវបានរៀបចំឡើង ដើម្បីប្រឹក្សាយោបល់ប្រមូលធាតុចូលទៅលើសេចក្តីព្រាងច្បាប់វិសោធនកម្មពីអ្នកជំនាញផ្នែកច្បាប់ ដើម្បីឱ្យកាន់តែមានតម្លាភាព ប្រសិទ្ធភាព និងស័ក្តិសិទ្ធភាពក្នុងការអនុវត្តសិទ្ធិអ្នកនិពន្ធក្នុងព្រះរាជាណាចក្រកម្ពុជា និង មានភាពប្រសើរឡើង គ្រប់ជ្រុងជ្រោយ ក៏ដូចជាធ្វើឱ្យមានសង្គតិភាពទៅនឹងបរិបទជាក់ស្តែងនៃសម័យបច្ចេកវិទ្យា ព្រមទាំងអនុសញ្ញា-សន្ធិសញ្ញានិងកិច្ចព្រមព្រៀងនានាដែលព្រះរាជាណាចក្រកម្ពុជាជាភាគី និងសមាជិកផងដែរ។ នៅក្នុងឱកាសនេះ លោកប្រធានបានគូសបញ្ជាក់ពីសារសំខាន់នៃច្បាប់ស្តីពីសិទ្ធិអ្នកនិពន្ធនិងសិទ្ធិប្រហាក់ប្រហែលក្នុងបរិបទនៃទំនើបកម្មច្បាប់ និងប្រព័ន្ធឌីជីថល ហើយបានស្នើឱ្យសហភាតាដែលបានចូលរួមផ្តល់ជាធាតុចូលឱ្យបានច្រើន ដើម្បីឱ្យច្បាប់នេះ អាចអនុវត្តបានស្របតាមកាលៈទេសៈសង្គម ក៏ដូចជាការចូលរួមដើម្បីវិបុលភាពនៃវិជ្ជាជីវៈមេធាវីផងដែរ។ លោកបានបន្ថែមថា ជាងនេះទៀត សិទ្ធិអ្នកនិពន្ធ និងសិទ្ធិប្រហាក់ប្រហែល គឺជាវិថីមួយដ៏សំខាន់បំផុត ក្នុងការទ្រទ្រង់គាំទ្រនូវគំនិតច្នៃប្រឌិត ការផលិតស្នាដៃ និងការផលិតថ្មី និងរក្សាការពារវប្បធម៌។ នៅពេលដែលអ្នកនិពន្ធ ឬអ្នកបង្កើតស្នាដៃ ត្រូវបានការពារដោយច្បាប់ និងទទួលបានការទទួលស្គាល់សិទ្ធិប្រកបដោយយុត្តិធម៌នោះ ពួកគាត់នឹងមានឆន្ទៈ និងកម្លាំងចិត្តបន្តទៀត ក្នុងការបង្កើតស្នាដៃថ្មីៗបន្ថែមទៀត។ សិទ្ធិអ្នកនិពន្ធ មិនត្រឹមតែសំខាន់សម្រាប់ផ្ទាល់ខ្លួននោះទេ ប៉ុន្តែថែមទាំងបានជួយលើកកម្ពស់ការរីកចម្រើនដល់សង្គម និងសេដ្ឋកិច្ចថែមទៀតផង។ ស្នាដៃទាំងនោះ អាចបំផុសគំនិតឱ្យមានការបង្កើតអាជីវកម្មថ្មីៗ ការរីកចម្រើនបច្ចេកវិទ្យា និងការចែករំលែកចំណេះដឹងក្នុងសង្គម។ ទន្ទឹមនឹងនេះ សិទ្ធិអ្នកនិពន្ធ ជាសិទ្ធិដែលផ្តល់ឱ្យដោយច្បាប់ដល់អ្នកនិពន្ធ សិល្បៈករ ឬអ្នកបង្កើតស្នាដៃផ្សេងៗទៀតក្នុងការប្រើប្រាស់ និងការពារស្នាដៃរបស់ខ្លួន។ ច្បាប់ស្តីពីសិទ្ធិអ្នកនិពន្ធ និងសិទ្ធិប្រហាក់ប្រហែល មានគោលបំណងធានាការគោរពសិទ្ធិអ្នកនិពន្ធ និងសិទ្ធិប្រហាក់ប្រហែល និងការពារនូវផលិតផល វប្បធម៌ ជាស្នាដៃអ្នកនិពន្ធ អ្នកសម្តែង ផលិតករហ្វូណូក្រាម និងអង្គភាពទូរផ្សាយ សំដៅធានាការធ្វើអាជីវកម្មមួយត្រឹមត្រូវស្របច្បាប់លើផលិតផលវប្បធម៌ទាំងនេះ ដើម្បីរួមចំណែកក្នុងការអភិវឌ្ឍវិស័យវប្បធម៌ ជាពិសេស មានការគាំទ្រ និងលើកទឹកចិត្តពីរាជរដ្ឋាភិបាលក្រោមការដឹកនាំប្រកបដោយភាពស្វាហាប់ និងចក្ខុវិស័យវែងឆ្ងាយ របស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា។

• បន្ទាប់