នៅថ្ងៃអង្គារ ៥កើត ខែផល្គុន ឆ្នាំជូត ទោស័ក ពុទ្ធសករាជ ២៥៦៤ ត្រូវនឹងថ្ងៃទី ១៦ ខែកុម្ភៈ ឆ្នាំ២០២១ នៅទីស្នាក់ការ

គណៈមេធាវីនៃព្រះរាជាណាចក្រកម្ពុជាបានរៀបចំការប្រជុំគណៈកម្មការជំនាញទាំង៥ (គណៈកម្មការកិច្ចការរដ្ឋប្បវេណី គណៈកម្មការកិច្ចការព្រហ្មទណ្ឌ គណៈកម្មការកិច្ចការការងារ គណៈកម្មការកិច្ចការពាណិជ្ជកម្ម និងគណៈកម្មការកិច្ចការសិទ្ធិមនុស្សនិងច្បាប់អន្តរជាតិ)ក្រោមអធិបតីភាពឯកឧត្តម លី ច័ន្ទតុលា ប្រធានគណៈមេធាវីនៃព្រះរាជាណាចក្រកម្ពុជា។

-------------------------

នៅក្នុងកិច្ចប្រជុំនេះផ្តោតសំខាន់លើរបៀបវារ:សំខាន់ចំនួន  ៨  រួមមានៈ

១.  មតិស្វាគមន៍របស់ឯកឧត្តមប្រធានគណៈមេធាវី

២.  បច្ចុប្បន្នភាពរបស់គណៈកម្មការជំនាញទាំង៥  លើកឡើងដោយប្រធានគណកម្មការ

៣.  ចំណាប់អារម្មណ៍របស់ប្រធាននាយកដ្ឋានស្រាវជ្រាវ  បោះពុម្ព  និងផ្សព្វផ្សាយនៃគណៈមេធាវី

៤.  ការលើកឡើងបញ្ហាប្រឈមផ្សេងៗរបស់សមាជិកគណកម្មការជំនាញទាំង៥

៥.  ការដោះស្រាយបញ្ហាប្រឈមនានារបស់គណៈកម្មការជំនាញទាំង៥

៦.  ទិសដៅការងារបន្តរបស់គណកម្មការជំនាញ  លើកឡើងដោយឯកឧត្តមប្រធានគណមេធាវី

៧.  ការស្នើឲ្យគណៈកម្មការទាំងអស់ចូលរួមស្ម័គ្រធ្វើជាមេធាវីការពារជនក្រីក្រស្របតាមគោលនយោបាយ ទើបតែដាក់ចេញ

៨.  បិទកម្មវិធីប្រជុំ

ជាលទ្ធផល ឯកឧត្តមប្រធានបានសម្រេចជាគោលការណ៍ដើម្បីដោះស្រាយបញ្ហាប្រឈមនានារបស់គណៈកម្មការជំនាញដូចតទៅៈ

១.  អនុញ្ញាតឱ្យប្រធានគណៈកម្មការនីមួយៗសម្របសម្រួលជាមួយប្រធាននាយកដ្ឋានស្រាវជ្រាវ បោះពុម្ព និងផ្សព្វផ្សាយ ដើម្បីរៀបចំកែសម្រួលសមាសភាពគណៈកម្មការ និងរៀបចំបទបញ្ជាផ្ទៃក្នុងរួមមួយ

២.  អនុញ្ញាតឲ្យប្រើប្រាស់បន្ទប់ប្រជុំចំនួន២ រួមមាន បន្ទប់ប្រជុំបច្ចុប្បន្នចំនួន ១ និងបន្ទប់ប្រជុំនៅអាគារគណៈមេធាវីចាស់ចំនួន១ 

៣.  លើកទឹកចិត្ត  និងជម្រុញអោយគណៈកម្មការជំនាញទាំង៥  ធ្វើសកម្មភាពក្នុងគោលបំណងលើកស្ទួយកិត្យានុភាពនិងឧត្តមានុភាពវិជ្ជាជីវៈមេធាវី

៤.  គណៈមេធាវីត្រៀមខ្លួនជាស្រេចសម្រាប់គាំទ្រសកម្មភាពរបស់គណៈកម្មការជំនាញទាំង៥

៥.  គណៈមេធាវីសូមលើកទឹកចិត្តនិងជម្រុញឲ្យសមាសភាពគណៈកម្មការជំនាញទាំង៥  ចូលរួមធ្វើជាវាគ្មិនផ្សព្វផ្សាយពីវិជ្ជាជីវៈមេធាវីនិងច្បាប់ជូនសាធារណ:ជនតាមវិទ្យុ ទូរទស្សន៍ និងតាមសិក្ខាសាលាឬវគ្គបណ្តុះបណ្តាលផ្សេងៗ

៦.  លើកទឹកចិត្តនិងជម្រុញសមាសភាពគណៈកម្មការជំនាញទាំង៥  សិក្សាអំពីទិដ្ឋភាពច្បាប់ដើម្បីដោះស្រាយបញ្ហាប្រឈមផ្សេងៗដែលសហភាតាមេធាវីកំពុងជួបប្រទះក្នុងការប្រកបវិជ្ជាជីវ:របស់ខ្លួន

៧.ផ្សេងៗ

ជាចុងបញ្ចប់នៃកិច្ចប្រជុំ  ឯកឧត្តមប្រធានគណៈមេធាវី  សូមថ្លែងអំណរគុណដល់លោក លោកស្រី ប្រធាន អនុប្រធាន សមាជិក គណកម្មការទាំងអស់ទទួលបានជោគជ័យគ្រ់ភារកិច្ច  និងជួបតែពុទ្ធពរទាំង  ៤ប្រការ  គឺអាយុ  វណ្ណៈ  សុខៈ  ពលៈ  កុំបីឃ្លៀងឃ្លាតឡើយ។

• មុន
• បន្ទាប់