លោកមេធាវី សាំង វណ្ណៈ ប្រធានគណៈមេធាវីនៃព្រះរាជាណាចក្រកម្ពុជា និងគណៈប្រភិភូបានអញ្ជើញចូលរួមសន្និសីទអន្តរជាតិស្តីពីវិជ្ជាជីវៈមេធាវី ក្រោមកិច្ចសហការជាមួយអាស៊ានប្រចាំឆ្នាំ២០២៥ក្រោមប្រធានបទ”សហប្រតិបត្តិការជាមួយអាស៊ានដើម្បីកសាងវាសនារួម” នៅទីក្រុងណាន់នីង ខេត្តគ័ងស៊ី នៃសាធារណៈរដ្ឋប្រជាមានិតចិន

ចាប់ពីព្រឹកថ្ងៃព្រហស្បតិ៍ ១១រោច ដល់ថ្ងៃសុក្រ ១២រោច ខែភទ្របទ ឆ្នាំម្សាញ់ សប្តស័ក ព.ស.២៥៦៩ ត្រូវនឹងថ្ងៃទី១៨ - ១៩ ខែកញ្ញា ឆ្នាំ២០២៥ លោកមេធាវី សាំង វណ្ណៈ ប្រធានគណៈមេធាវីនៃព្រះរាជាណាចក្រកម្ពុជា និងគណៈប្រភិភូបានអញ្ជើញចូលរួមសន្និសីទអន្តរជាតិស្តីពីវិជ្ជាជីវៈមេធាវី ក្រោមកិច្ចសហការជាមួយអាស៊ានប្រចាំឆ្នាំ២០២៥ (2025 International Legal Practice Conference-Cooperating with ASEA​N)ក្រោមប្រធានបទ”សហប្រតិបត្តិការជាមួយអាស៊ានដើម្បីកសាងវាសនារួម” (Cooperating with ASEAN, Shaping the Future Together) នៅទីក្រុងណាន់នីង ខេត្តគ័ងស៊ីនៃសាធារណៈរដ្ឋប្រជាមានិតចិន។ នៅថ្ងៃទី១៨ ខែកញ្ញា លោកប្រធាន បានអញ្ជើញចូលរួមកិច្ចសន្ទនាស្តីពីដំណើរការនិងការគ្រប់គ្រងវិជ្ជាជីវៈមេធាវី ក្រោមការសម្របសម្រួលរបស់អនុប្រធានមន្ទីរយុត្តិធម៌នៃខេត្តគ័ងស៊ី(Deputy Director of the Guangxi Department of Justice) នៅទីស្នាក់ការគណៈមេធាវីគ័ងស៊ី (Guangxi Lawyers Association) ជាមួយនឹងថ្នាក់ដឹកនាំនៃគណៈមេធាវីនានា ដែលអញ្ជើញចូលរួមក្នុងសន្និសីទអន្តរជាតិខាងលើ មានជាអាទិ៍សហព័ន្ធគណៈមេធាវីវៀតណាម គណៈមេធាវីម៉ាឡេស៊ី គណៈមេធាវីម៉ាកាវ គណៈមេធាវីហុងកុង គណៈមេធាវីប្រ៊ុយណេ គណៈមេធាវីគ័ងស៊ី​ គណៈមេធាវីសឹង្ហបុរី និងគណៈមេធាវីឥណ្ឌូនេស៊ីជាដើម។ ក្នុងឱកាសនោះ លោកមេធាវី សាំង វណ្ណៈ បានជម្រាបជូនអង្គប្រជុំអំពីក្របខណ្ឌច្បាប់ វឌ្ឍនភាពនៃវិជ្ជាជីវៈមេធាវីនៅកម្ពុជា ការចូលរួមនៅក្នុងដំណើរការកំណែទម្រង់ច្បាប់ ប្រព័ន្ធយុត្តិធម៌ ការពង្រឹងនូវការអនុវត្តច្បាប់ និងនីតិរដ្ឋនៅកម្ពុជា ជាពិសេសមានការចែករំលែក និងកិច្ចសហការល្អជាមួយក្រសួង-ស្ថាប័ននានា ក្នុងការលើកកម្ពស់សិទ្ធិទទួលបានយុត្តិធម៌(Access to Justice) និងការផ្តល់ជំនួយផ្លូវច្បាប់ជាដើម។ ដោយឡែកនៅថ្ងៃទី១៩ ខែកញ្ញា លោកប្រធាន និងប្រតិភូអន្តរជាតិទាំងអស់ ត្រូវបានអញ្ជើញឱ្យចូលរួមក្នុងពិធីបើកសន្និសីទស្តីពីវិជ្ជា​ជីវៈមេធាវីខាងលើ ដែលប្រារព្ធធ្វើនៅមជ្ឈមណ្ឌលពិព័រណ៍និងសន្តិសីទអន្តរជាតិណាន់នីង(Nanning International Convention and Exhibition Center)។ ក្នុងសន្និសីទនោះ មានការចែករំលែកបទពិសោធន៍ពាក់ព័ន្ធនឹងវិជ្ជាជីវៈមេធាវី សេវាកម្មច្បាប់/មេធាវីក្នុងវិស័យជាច្រើន ដូចជាការវិនិយោគអាស៊ាន ពាណិជ្ជកម្មអន្តរជាតិ កម្មសិទ្ធិបញ្ញា ដំណោះស្រាយជម្លោះនៃផ្លូវសមុទ្រអន្តរជាតិ ការអនុវត្តវិជ្ជាជីវៈមេធាវីអន្តរជាតិក្នុងយុគសម័យអេអាយ(AI in International Legal Service Practice) និងលំហូរពាណិជ្ជកម្មអន្តរជាតិឆ្លងកាត់ព្រំដែនជាដើម ។ សូមបញ្ជាក់ផងដែរថា តាមការគ្រោងទុក លោកមេធាវី សាំង វណ្ណៈ និងគណៈប្រតិភូគណៈមេធាវីនៃព្រះរាជាណាចក្រកម្ពុជា នឹងត្រឡប់មកមាតុប្រទេសវិញនៅរសៀលថ្ងៃទី២០ ខែកញ្ញា ឆ្នាំ២០២៥នេះ៕

• មុន
• បន្ទាប់