កិច្ចប្រជុំអំពីកិច្ចសហប្រតិបត្តិការក្នុងការអនុវត្តអនុស្សរណៈនៃការយោគយល់រវាងគណៈមេធាវីនៃព្រះរាជាណាចក្រកម្ពុជា និងនិយ័តករបរធនបាលកិច្ច

នាព្រឹក ថ្ងៃសុក្រ ៧រោច ខែមិគសិរ ឆ្នាំម្សាញ់ សប្តស័ក ព.ស.២៥៦៩ ត្រូវនឹងថ្ងៃទី១២ ខែធ្នូ ឆ្នាំ២០២៥ គណៈមេធាវីនៃព្រះរាជាណាចក្រកម្ពុជានិងនិយ័តករបរធនបាលកិច្ចបានរៀបចំកិច្ចប្រជុំអំពីកិច្ចសហប្រតិបតិ្តការក្នុងអនុវត្តអនុស្សរណៈនៃការយោគយល់រវាងស្ថាប័នទាំងពីរ ក្រោមអធិបតីភាពលោកមេធាវី សាំង វណ្ណៈ ប្រធានគណៈមេធាវីនៃព្រះរាជាណាចក្រកម្ពុជា​ និងឯកឧត្តម សុខ ដារ៉ា អគ្គនាយកនៃនិយ័តករបរធនបាលកិច្ច ព្រមទាំងមានការចូលរួមពីថ្នាក់ដឹកនាំ និងមន្ត្រីបច្ចេកទេសនៃស្ថាប័នទាំងពីរ។ ជាលទ្ធផល អង្គប្រជុំបានឯកភាពគ្នាទៅលើចំណុចដូចខាងក្រោម៖ ១. រៀបចំឱ្យមានការបណ្តុះបណ្តាលនិងការផ្សព្វផ្សាយច្បាប់និងបទដ្ឋានគតិយុត្តទាក់ទងនឹងបរធនបាលកិច្ច ដោយក្រុមការងារបច្ចេកទេសនឹងកំណត់នូវកាលបរិច្ឆេទ និងប្រធានបទជាក់លាក់ សម្រាប់ការអនុវត្តក្នុងឆ្នាំនីមួយៗ ២. បញ្ជ្រាបអំពីការប្រកបវិជ្ជាជីវៈមេធាវីក្នុងវិស័យបរធនបាលកិច្ច ៣. បង្ហាញអំពីជំហរគាំទ្រគ្នាទៅវិញទៅមកក្នុងការផ្សព្វផ្សាយច្បាប់និងបទដ្ឋានគតិយុត្តទាក់ទងនឹងបរធនបាលកិច្ច ព្រមទាំងពង្រីកទីផ្សារការងាររបស់មេធាវីក្នុងវិស័យបរធនបាលកិច្ច ៤. លើកឡើងបញ្ហាប្រឈមនានាកំពុងជួបប្រទះ និងដំណោះស្រាយ ៥. ពិនិត្យលទ្ធភាពក្នុងការកែសម្រួលអនុស្សរណៈនៃការយោគយល់រវាងស្ថាប័នទាំងពីរ ដោយបង្កើនទំហំនៃកិច្ចសហប្រតិបត្តិការឱ្យកាន់តែទូលំទូលាយបន្ថែមទៀត ៦. ពិនិត្យលទ្ធភាពនៃការបញ្ចូលមុខវិជ្ជាសិក្សាពាក់ព័ន្ធនឹងបរធនបាលកិច្ចក្នុងការបណ្តុះបណ្តាលសិស្សមេធាវី ដោយមានជំនួយបច្ចេកទេសពីនិយ័តករបរធនបាលកិច្ច ៧. ពិនិត្យលទ្ធភាពក្នុងការអនុញ្ញាតឱ្យសមាជិកគណៈមេធាវីចូលរួមវគ្គបណ្តុះបណ្តាលគុណវុឌ្ឍិដែលរៀបចំដោយនិយ័តករបរធនបាលកិច្ច និងវគ្គបណ្តុះបណ្តាលដែលរៀបចំដោយដៃគូសហការផ្សេងទៀតរបស់និយ័តករបរធនបាលកិច្ចដោយឥតគិតថ្លៃ

• មុន
• បន្ទាប់