លោកមេធាវី សាំង វណ្ណៈ ប្រធានគណៈមេធាវីនៃព្រះរាជាណាចក្រកម្ពុជា បានអនុញ្ញាតឱ្យលោក សាន គីរី ប្រធានមជ្ឈមណ្ឌលជាតិនៃមជ្ឈត្តការផ្នែកពាណិជ្ជកម្មចូលជួបសំដែងការគួរសម និងពិភាក្សាការងារ

នារសៀលថ្ងៃចន្ទ ២កើត ខែមិគសិរ ឆ្នាំរោង ឆស័ក ព.ស.២៥៦៨ ត្រូវនឹងថ្ងៃទី២ ខែធ្នូ ឆ្នាំ២០២៤ លោកមេធាវី សាំង វណ្ណៈ ប្រធានគណៈមេធាវីនៃព្រះរាជាណាចក្រកម្ពុជា បានអនុញ្ញាតឱ្យលោក សាន គីរី ប្រធានមជ្ឈមណ្ឌលជាតិនៃមជ្ឈត្តការផ្នែកពាណិជ្ជកម្មចូលជួបសំដែងការគួរសម និងពិភាក្សាការងារ នៅទីស្នាក់ការគណៈមេធាវីនៃព្រះរាជាណាចក្រកម្ពុជា។ ក្នុងជំនួបនេះ លោកមជ្ឈត្តករ សាន គីរី បានលើកឡើងនូវសំណើមួយចំនួនមកកាន់លោកប្រធានរួមមាន៖ ១.ការបន្តអនុស្សរណៈនៃការយោគយល់រវាងគណៈមេធាវីនៃព្រះរាជាណាចក្រកម្ពុជា និងមជ្ឈមណ្ឌលជាតិនៃមជ្ឈត្តការផ្នែកពាណិជ្ជកម្ម ២.ការរៀបចំសិក្ខាសាលារួមគ្នារវាងស្ថាប័នទាំងពីរ ៣.ការសហការគាំទ្ររបស់គណៈមេធាវីចំពោះសិក្ខាសាលាអន្តរជាតិ និងសវនាការប្រតិដ្ឋ ដែលមជ្ឈមណ្ឌលជាតិនៃមជ្ឈត្តការផ្នែកពាណិជ្ជកម្មនឹងរៀបចំនៅដើមឆ្នាំ២០២៥ ខាងមុខនេះ ៤.ការសហការពីគណៈមេធាវីក្នុងការផ្តល់អនុសាសន៍ដល់ស្ថាប័នមានសមត្ថកិច្ចលើកំណែទម្រង់លើបទដ្ឋានគតិយុត្តក្នុងវិស័យមជ្ឈត្តការពាណិជ្ជកម្ម ៥.ការបញ្ចូលនូវមុខវិជ្ជាសន្ធានកម្មទៅក្នុងកម្មវិធីសិក្សារបស់មជ្ឈមណ្ឌលបណ្តុះបណ្តាលវិជ្ជាជីវៈមេធាវី ជាការឆ្លើយតប លោកប្រធានបានបង្ហាញនូវការគាំទ្រចំពោះសំណើរបស់មជ្ឈមណ្ឌលជាតិនៃមជ្ឈត្តការផ្នែកពាណិជ្ជកម្ម និងពិចារណាអំពីលទ្ធភាពក្នុងការបញ្ចូលមុខវិជ្ជាសន្ធានកម្មទៅក្នុងកម្មវិធីសិក្សារបស់មជ្ឈមណ្ឌលបណ្តុះបណ្តាលវិជ្ជាជីវៈមេធាវី។

• Prev
• Next