លោកមេធាវី សាំង វណ្ណៈ ប្រធានគណៈមេធាវីនៃព្រះរាជាណាចក្រកម្ពុជា ទទួលជួបសម្តែងការគួរសម និងពិភាក្សាការងារជាមួយគណៈគ្រប់គ្រងធនាគារវីង

នៅថ្ងៃអង្គារ ៥កើត ខែកត្តិក ឆ្នាំរោង ឆស័ក ព.ស.២៥៦៨ ត្រូវនឹងថ្ងៃទី៥ ខែវិច្ឆិកា ឆ្នាំ២០២៤ លោកមេធាវី សាំង វណ្ណៈ ប្រធានគណៈមេធាវីនៃព្រះរាជាណាចក្រកម្ពុជា បានទទួលជួបជាមួយតំណាងធនាគារវីង ក្នុងជំនួបសម្តែងការគួរសម និងពិភាក្សាការងារពាក់ព័ន្ធនឹងការស្នើផ្តល់ជូនសេវាកម្មឥណទានរបស់ធនាគារ ជូនគណៈមេធាវី។ តំណាងធនាគារវីង បានពាំនាំមតិផ្តាំផ្ញើអបអរសាទរពីសំណាក់អ្នកឧកញ៉ា គិត ម៉េង អគ្គនាយកធនាគារវីង និងឆន្ទៈក្នុងការបន្តចរន្តការងាររបស់ធនាគារវីង ជាមួយគណៈមេធាវី។ ក្នុងន័យនេះ តំណាងធនាគារវីង បានស្នើសុំគណៈមេធាវីពិនិត្យលទ្ធភាពចុះអនុស្សរណៈជាមួយធនាគារ ដើម្បីជួយសម្របសម្រួលដល់ទំនាក់ទំនងរវាងភាគីទាំងពីរ។ ជាការឆ្លើយតប លោកប្រធានគណៈមេធាវីបានមានប្រសាសន៍ថ្លែងអំណរគុណចំពោះធនាគារវីង ដែលបានផ្តល់ជូនសេវាកម្មឥណទានរបស់ធនាគារ ជូនគណៈមេធាវី។ ការផ្តល់ឥណទានកម្ចីនេះក៏ជាចំណុចល្អមួយដែរ សម្រាប់សហភាតាមេធាវីដែលមានតម្រូវការ តាមការសម្រេចរបស់សាមីខ្លួន។ នៅទីបញ្ចប់នៃកិច្ចជំនួបនេះ លោកប្រធានគណៈមេធាវី បានជូនពរប្រតិភូនៃធនាគារវីង សូមបានប្រកបនូវពុទ្ធពរទាំងបួនប្រការ គឺ អាយុ វណ្ណៈ សុខៈ ពលៈ កុំបីឃ្លៀងឃ្លាតឡើយ។

• Prev
• Next