លោកមេធាវី សួន វិសាល ប្រធានគណៈមេធាវី បានទទួលជួបមន្រ្តីជាន់ខ្ពស់សេដ្ឋកិច្ចរបស់ធនាគារពិភពលោក និងសហការី ដើម្បីជួបពិភាក្សាការងារ

នៅព្រឹកថ្ងៃអង្គារ ៨កើត ខែមាឃ ឆ្នាំច សំរឹទ្ធិស័ក ព.ស ២៥៦២ ត្រូវនឹងថ្ងៃទី១២ ខែកុម្ភៈ ឆ្នាំ២០១៩ លោកមេធាវី សួន វិសាល ប្រធានគណៈមេធាវី បានទទួលជួបលោក Miguel Eduardo S’anchez Mart’in ជាមន្រ្តីជាន់ខ្ពស់សេដ្ឋកិច្ចរបស់ធនាគារពិភពលោក និងសហការី ដើម្បីជួបពិភាក្សាការងារ។

នៅក្នុងកិច្ចប្រជុំនេះលោកមេធាវី សួនវិសាលបានលើកយកសមទ្ធផលសំខាន់ៗដែលសម្រេចបាននៅក្នុងអាណត្តិនៃការដឹកនាំរបស់លោក ដូចជា ការបង្កើននូវម៉ោងសិក្សា និងមុខវិជ្ជាជំនាញអនុវត្តជាក់ស្តែងសម្រាប់សុក្រិតការមេធាវី ការបង្កើតប្រតិភូគណៈមេធាវីនៅតាមសាលាដំបូងរាជធានី/ខេត្ត ការធ្វើទំនើបកម្មនៃការគ្រប់គ្រងអង្គភាពគណៈមេធាវីតាមរយៈការប្រើប្រាស់ប្រព័ន្ធបច្ចេកវិទ្យាជាដើម លោកប្រធានគណៈមេធាវីក៏បានបង្ហាញពីតម្រូវការចាំបាច់របស់គណៈមេធាវីនាពេលបច្ចុប្បន្ន ជាពិសេស កង្វះនូវថវិកាសម្រាប់ជួយរឿងក្តីក្រីក្រ ការពង្រឹងសមត្ថភាពបន្ថែមដែលពាក់ព័ន្ធនឹងវិធានពាណិជ្ជកម្មអន្តរជាតិ និងបទដ្ឋានគតិយុត្តិផ្សេងៗទៀត ជាដើម។ លោក Miguel Eduardo S’anchez Mart’in បានឆ្លើយតបថា លោកនឹងយកតម្រូវការរបស់គណៈមេធាវីទៅជជែក ពិភាក្សាជាមួយថ្នាក់ដឹកនាំរបស់ខ្លួនបន្តទៀត។

កិច្ចប្រជុំបានបញ្ចប់នៅ ក្រោមបរិយាកាសយោគយល់ និងស្និទ្ធស្នាល។

001