ឯកឧត្តម លី ច័ន្ទតុលា ប្រធានគណៈមេធាវីនៃព្រះរាជាណាចក្រកម្ពុជា អមដោយអគ្គលេខាធិការ អគ្គលេខាធិការរង និងប្រធាននាយកដ្ឋានទំនាក់ទំនងសាធារណៈនិងសហប្រតិបត្តិការអន្តរជាតិ

នៅរសៀលថ្ងៃពុធ ០៦កើត ខែផល្គុន ឆ្នាំជូត ទោស័ក ព.ស. ២៥៦៤ ត្រូវនឹងថ្ងៃទី ១៧ ខែកុម្ភៈ ឆ្នាំ ២០២១ នៅទីស្នាក់ការគណៈមេធាវី ឯកឧត្តម លី ច័ន្ទតុលា

ប្រធានគណៈមេធាវីនៃព្រះរាជាណាចក្រកម្ពុជា អមដោយអគ្គលេខាធិការ អគ្គលេខាធិការរង និងប្រធាននាយកដ្ឋានទំនាក់ទំនងសាធារណៈនិងសហប្រតិបត្តិការអន្តរជាតិ បានបើកកិច្ចពិភាក្សាជាមួយសមាគមកម្មសិទ្ធិបញ្ញាកម្ពុជា ពាក់ព័ន្ធនឹងការចុះអនុស្សរណៈនៃការយោគយល់រវាងគណៈមេធាវីនៃព្រះរាជាណាចក្រកម្ពុជា និងសមាគមកម្មសិទ្ធិបញ្ញាកម្ពុជា។

ការពិភាក្សាផ្តោតលើកម្មវត្ថុចំបងៗដូចខាងក្រោម៖

១- ឯកឧត្តមប្រធានគណៈមេធាវីគាំទ្រសកម្មភាពរបស់សមាគមកម្មសិទ្ធិបញ្ញាកម្ពុជា និងការឈានទៅដល់ការចុះអនុស្សរណៈនៃការយោគយល់ ដើម្បីជាផលប្រយោជន៍រួមសម្រាប់ស្ថាប័នទាំងពីរ ជាពិសេសផលប្រយោជន៍ដល់សង្គមនិងសេដ្ឋកិច្ចនៃប្រទេសជាតិទាំងមូល។

២- ឯកឧត្តមប្រធានគណៈមេធាវីបានឯកភាពលើការសហការរៀបចំការផ្សព្វផ្សាយពាក់ព័ន្ធនឹងបទប្បញ្ញត្តិក្នុងវិស័យកម្មសិទ្ធិបញ្ញា និងការរៀបចំឲមានការអប់រំបណ្តុះបណ្តាលមុខវិជ្ជាកម្មសិទ្ធិបញ្ញាដល់សមាជិក-សមាជិកាគណៈមេធាវី និងសិស្សមេធាវី ស្របតាមគោលនយោបាយរបស់ឯកឧត្តមប្រធានគណៈមេធាវី ក្នុងការពង្រឹងបន្ថែមនូវជំនាញវិជ្ជាជីវៈរបស់មេធាវី។

៣- ឯកឧត្តមប្រធានគណៈមេធាវីបានឯកភាពឲមានការចាត់តាំងមេធាវីសម្រាប់ផ្តល់ជំនួយផ្នែកច្បាប់ តាមរយៈការពិគ្រោះយោបល់ដោយមិនយកកម្រៃ ក្នុងវិស័យកម្មសិទ្ធិបញ្ញា។

៤- ឯកឧត្តមប្រធានគណៈមេធាវីបានឯកភាពលើការបង្កើតក្រុមការងារចំពោះកិច្ច ដើម្បីពិភាក្សាឯកភាពលើខ្លឹមសារនៃអនុស្សរណៈនៃការយោគយល់គ្នារវាងស្ថាប័នទាំងពីរ ក្នុងទិសដៅពង្រឹងក្របខ័ណ្ឌនៃកិច្ចសហប្រតិបត្តិការឲកាន់តែមានប្រសិទ្ធភាព ហើយគ្រោងនឹងចុះហត្ថលេខាជាមួយគ្នានាពេលឆាប់ៗខាងមុខនេះ។

ជំនួបពិភាក្សានេះបានបញ្ចប់ ក្រោមបរិយាកាសរីករាយ យោគយល់ និងមានការទទួលខុសត្រូវខ្ពស់។

photo 2021 02 17a