លោកមេធាវី ឃុត កែវសុត្ថា សមាជិកក្រុមប្រឹក្សាគណៈមេធាវី និងលោកមេធាវី វិច សុវាចា សមាជិកក្រុមប្រឹក្សាគណៈមេធាវី តំណាងលោកមេធាវី សាំង វណ្ណៈ ប្រធានគណៈមេធាវីនៃព្រះរាជាណាចក្រកម្ពុជា បានអញ្ជើញជាគណៈអធិបតីក្នុងសិក្ខាសាលា ស្តីពី «បញ្ញាសិប្បនិម្មិត និងការអនុវត្តច្បាប់»

នាព្រឹកថ្ងៃពុធ ៧រោច ខែមាឃ ឆ្នាំរោង ឆស័ក ព.ស.២៥៦៨ ត្រូវនឹងថ្ងៃទី១៩ ខែកុម្ភៈ ឆ្នាំ២០២៥ គណៈមេធាវីនៃព្រះរាជាណាចក្រកម្ពុជា សាកលវិទ្យាល័យជាតិគ្រប់គ្រង និងសាលាច្បាប់អន្តរជាតិហានដុងនៃសាធារណៈរដ្ឋកូរ៉េខាងត្បូង បានសហការរៀបចំសិក្ខាសាលា ស្តីពី «បញ្ញាសិប្បនិម្មិត និងការអនុវត្តច្បាប់» ដោយមានលោកសាស្ត្រាចារ្យ David Lee Mundy (US Attorney) ជាវាគ្មិនកិត្តិយស និងមានការចូលរួមពីសំណាក់ថ្នាក់ដឹកនាំមជ្ឈមណ្ឌលបណ្តុះបណ្តាលវិជ្ជាជីវៈមេធាវី គណៈគ្រប់គ្រងនិងក្រុមការងារសាកលវិទ្យាល័យជាតិគ្រប់គ្រង ព្រមទាំងសិក្ខាកាមចូលរួមចំនួន ១២៤នាក់។ សិក្ខាសាលានេះរៀបចំឡើងក្នុងគោលបំណងដើម្បីចែករំលែក និងផ្លាស់ប្តូរបទពិសោធន៍ទាក់ទងនឹងការប្រើប្រាស់បច្ចេកវិទ្យាសិប្បនិម្មិតក្នុងក្រុមហ៊ុនមេធាវីនៅព្រះរាជាណាចក្រកម្ពុជា និងសាធារណៈរដ្ឋកូរ៉េ។ នៅក្នុងឱកាសនោះ លោកមេធាវី ឃុត កែវសុត្ថា សមាជិកក្រុមប្រឹក្សាគណៈមេធាវី តំណាងលោកមេធាវី សាំង វណ្ណៈ ប្រធានគណៈមេធាវីនៃព្រះរាជាណាចក្រកម្ពុជា បានអញ្ជើញថ្លែងសុន្ទរកថាបើកកម្មវិធី ព្រមទាំងស្នើសិក្ខាកាមចូលរួមសួរសំណួរឱ្យបានផុសផុលទៅកាន់វាគ្មិន។ បន្ថែមពីនេះ ក៏មានការអញ្ជើញថ្លែងចំណាប់អារម្មណ៍ដោយ សាស្ត្រាចារ្យជំនួយបណ្ឌិត សេង ប៊ុនធឿន សាកលវិទ្យាធិការរងសាកលវិទ្យាល័យជាតិគ្រប់គ្រង និងលោកបណ្ឌិត Kim Jeong Woo សាស្ត្រាចារ្យច្បាប់នៃសាលាច្បាប់អន្តរជាតិហានដុងនៃសាធារណៈរដ្ឋកូរ៉េ។ ជាចុងបញ្ចប់ លោកមេធាវី វិច សុវាចា សមាជិកក្រុមប្រឹក្សាគណៈមេធាវី តំណាងលោកមេធាវី សាំង វណ្ណៈ ប្រធានគណៈមេធាវីនៃព្រះរាជាណាចក្រកម្ពុជា ក៏បានអញ្ជើញថ្លែងសុន្ទរកថាបិទកម្មវិធី ព្រមទាំងថ្លែងអំណរគុណដល់សាកលវិទ្យាល័យជាតិគ្រប់គ្រងនិងសាលាច្បាប់អន្តរជាតិហានដុងនៃសាធារណៈរដ្ឋកូរ៉េ ដែលបានសហការជាមួយគណៈមេធាវីរៀបចំសិក្ខាសាលានេះឡើង និងសិក្ខាកាមដែលបានចូលរួមតាំងពីដើមរហូតដល់ចប់កម្មវិធី។ សិក្ខាសាលានេះប្រព្រឹត្តទៅនៅទីស្នាក់ការគណៈមេធាវីនៃព្រះរាជាណាចក្រកម្ពុជា។

P2 480719519 1154254976493722 2576122577259533680 n