លោកមេធាវី សាំង វណ្ណៈ ប្រធានគណៈមេធាវីនៃព្រះរាជាណាចក្រកម្ពុជា បានចាត់តាំងលោកមេធាវី ហៀង មករា និងលោកមេធាវី សាន សុភ័ក្រ ចូលរួម «កម្មវិធីបើកសម្ពោធវេទិកា ស្តីពីការផ្លាស់ប្តូរ បទពិសោធន៍គ្នាទៅវិញទៅមក និងសហប្រតិបត្តិការជាមួយគ្នា ដោយផ្អែកលើយន្តការ នៃការសម្របសម្រួលសេវាផ្នែកច្បាប់របស់បណ្តាប្រទេសនៃអាងទន្លេមេគង្គឡានឆាង »

នារសៀលថ្ងៃអង្គារ ១៣រោច ខែកត្តិក ឆ្នាំម្សាញ់ សប្តស័ក ព.ស.២៥៦៩ ត្រូវនឹងថ្ងៃទី១៨ ខែវិច្ឆិកា ឆ្នាំ២០២៥ លោកមេធាវី សាំង វណ្ណៈ ប្រធានគណៈមេធាវីនៃព្រះរាជាណាចក្រកម្ពុជា បានចាត់តាំងលោកមេធាវី ហៀង មករា និងលោកមេធាវី សាន សុភ័ក្រ ចូលរួម « កម្មវិធីបើកសម្ពោធវេទិកាស្តីពី ការផ្លាស់ប្តូរបទពិសោធន៍គ្នាទៅវិញទៅមក និងសហប្រតិបត្តិការជាមួយគ្នា ដោយផ្អែកលើយន្តការ នៃការសម្របសម្រួលសេវាផ្នែកច្បាប់របស់បណ្តាប្រទេសនៃអាងទន្លេមេគង្គឡានឆាង» (Launching Ceremony of the Lancang-Mekong River Basin Legal Service Coordination Mechanism and Cooperation & Exchange Forum) ដែលនឹងត្រូវប្រព្រឹត្តទៅនៅថ្ងៃទី១៩ ខែវិច្ឆិកា ឆ្នាំ២០២៥ នៅទីក្រុង ឃុនមីង (Kunming) នៃខេត្ត យូណាន (Yunnan) សាធារណៈរដ្ឋប្រជាមានិតចិន។ ការអញ្ជើញចូលរួមនៃប្រតិភូរបស់គណៈមេធាវីខាងលើនេះ គឺជាការឆ្លើយតបទៅនឹងសំណើ និងការអញ្ជើញរបស់មជ្ឈមណ្ឌលសេវាច្បាប់ឃុនមីងភាគខាងត្បូង និងអាស៊ីអាគ្នេយ៍ (Kunming South and Southeast Asia Legal Services Center)។ វេទិកានេះនឹងមានការផ្លាស់ប្តូរបទពិសោធន៍ គ្នាទៅវិញទៅមក និងជំរុញកិច្ចសហប្រតិបត្តិការជាមួយគ្នា ឈរលើយន្តការនៃការសម្របសម្រួលវិវាទពាណិជ្ជកម្ម និងកាលានុវត្តភាពនៃកិច្ចសហការគ្នាក្នុងវិស័យច្បាប់នៃបណ្តាប្រទេសនៅតំបន់អាស៊ីអាគ្នេយ៍ និងខេត្តយូណាន ជាពិសេសបទពិសោធន៍នៃការគ្រប់គ្រងការិយាល័យមេធាវីជាដើម។ សូមបញ្ជាក់ផងដែរថា ក្នុងវេទិកានេះ មានប្រតិភូដែលអញ្ជើញមកពីស្ថាប័នវិជ្ជាជីវៈមេធាវីនៃបណ្តាប្រទេសអាងទន្លេមេគង្គឡានឆាងដូចជា៖ ប្រទេសចិន មីយ៉ាន់ម៉ា ឡាវ ថៃ កម្ពុជា និងវៀតណាម និងស្ថាប័នតុលាការនៃសាធារណៈរដ្ឋប្រជាមានិតចិន ព្រមទាំងប្រទេសនៃតំណាងអាស៊ីផងដែរ។

• Prev
• Next