លោកមេធាវី សាំង វណ្ណៈ អនុញ្ញាតឱ្យលោក Kamiki Atsushi ប្រធានគណៈកម្មាធិការកិច្ចការអន្តរជាតិនៃគណៈមេធាវីខេត្តអ៊ីវ៉ាតេ ប្រទេសជប៉ុន ចូលជួបសម្តែងការគួរសម និងពិភាក្សាការងារ

នាព្រឹកថ្ងៃអង្គារ ៥កើត ខែកត្តិក ឆ្នាំរោង ឆស័ក ព.ស.២៥៦៨ ត្រូវនឹងថ្ងៃទី៥ ខែវិច្ឆិកា ឆ្នាំ២០២៤ លោកមេធាវី សាំង វណ្ណៈ ប្រធានគណៈមេធាវីនៃព្រះរាជាណាចក្រកម្ពុជា បានអនុញ្ញាតឱ្យលោក Kamiki Atsushi ប្រធានគណៈកម្មាធិការកិច្ចការអន្តរជាតិនៃគណៈមេធាវីខេត្តអ៊ីវ៉ាតេ ប្រទេសជប៉ុន (Chairman of the International Committee of the Bar Association of Iwate Prefecture, Japan) ចូលជួបសម្តែងការគួរសម និងអបអរសាទរក្នុងឱកាសដែលលោកប្រធានត្រូវបានអង្គមហាសន្និបាត បោះឆ្នោតជ្រើសតាំងជាប្រធានគណៈមេធាវីអាណត្តិទី១៥ កាលពីថ្ងៃទី១៦ ខែតុលា ឆ្នាំ២០២៤។ ក្នុងឱកាសនោះ លោកប្រធានគណៈមេធាវី បានសម្តែងអំណរគុណ និងស្វាគមន៍ចំពោះលោក Kamiki Atsushi និងសហការី សម្រាប់ការអញ្ជើញមកសម្តែងការគួរសម អបអរសាទរ និងពិភាក្សាការងារ។ បន្ទាប់មកលោកប្រធាន និងលោក Kamiki Atsushi បានចែករំលែកបទពិសោធន៍នៃកិច្ចសហប្រតិបត្តិការរវាងកម្ពុជា និងជប៉ុន លើវិស័យយុត្តិធម៌ ជាពិសេសអំពីទំនាក់ទំនងជាមួយទីភ្នាក់ងារសហប្រតិបត្តិការអន្តរជាតិនៃប្រទេសជប៉ុន (JICA) ប្រចាំកម្ពុជា ក្នុងការចូលរួមរៀបចំតាក់តែង ក្រមរដ្ឋប្បវេណី និងក្រមនីតិវិធីរដ្ឋប្បវេណី នាពេលកន្លងមក។ ទន្ទឹមនឹងនេះ លោកប្រធានគណៈមេធាវី បានជម្រាបជូនគណៈប្រតិភូ អំពីគោលនយោបាយដឹកនាំទាំង ៩ចំណុច ដែលបានដាក់ចេញដើម្បីដឹកនាំគណៈមេធាវីនៃព្រះរាជាណាចក្រកម្ពុជា សម្រាប់អាណត្តិទី១៥ (ឆ្នាំ២០២៤-២០២៦) ដែលគោលនយោបាយនេះ បានអនុវត្តនូវផែនការសកម្មភាព ស្របតាមយុទ្ធសាស្រ្តបញ្ចកោណដំណាក់កាលទី១ មុំទី៤ របស់រាជរដ្ឋាភិបាលកម្ពុជា ពាក់ព័ន្ធនឹងការពង្រឹងប្រសិទ្ធភាពច្បាប់ និងប្រព័ន្ធយុត្តិធម៌ ក្រោមការដឹកនាំដ៏ឈ្លាសវៃ និងប្រកបដោយគតិបណ្ឌិតរបស់សមេ្តចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា។ ជាទីបញ្ចប់ លោកប្រធានគណៈមេធាវី បានថ្លែងអំណរគុណ និងជូនពរដល់ លោកប្រធានគណៈកម្មាធិការកិច្ចការអន្តរជាតិ នៃគណៈមេធាវីខេត្តអ៊ីវ៉ាតេ ប្រទេសជប៉ុន និងសហការី សូមបានប្រកបនូវពុទ្ធពរទាំងបួនប្រការ គឺ អាយុ វណ្ណៈ សុខៈ ពលៈ កុំបីឃ្លៀងឃ្លាតឡើយ។

• Prev
• Next