លោកមេធាវី សាំង វណ្ណៈ ប្រធានគណៈមេធាវីនៃព្រះរាជាណាចក្រកម្ពុជា ដឹកនាំប្រតិភូចូលរួមពិធីចុះអនុស្សរណៈនៃការយោគយល់រវាងគណៈមេធាវីនៃព្រះរាជាណាចក្រកម្ពុជានិងមជ្ឈមណ្ឌលស្រាវជ្រាវច្បាប់អាស៊ាន-ចិន និងពិធីលៀងសាយភោជន៍

នាថ្ងៃសុក្រ ១កើត ខែមិគសិរ ឆ្នាំម្សាញ់ សប្តស័ក ព.ស.២៥៦៩ ត្រូវនឹងថ្ងៃទី២១ ខែវិច្ឆិកា ឆ្នាំ២០២៥ លោកមេធាវី សាំង វណ្ណៈ ប្រធានគណៈមេធាវីនៃព្រះរាជាណាចក្រកម្ពុជា ដឹកនាំប្រតិភូចូលរួមពិភាក្សាការងារ និងចែករំលែកបទពិសោធន៍ផ្នែកច្បាប់ជាមួយមជ្ឈមណ្ឌលស្រាវជ្រាវច្បាប់អាស៊ាន-ចិនព្រមទាំងពិធីចុះអនុស្សរណៈនៃការយោគយល់រវាងគណៈមេធាវីនៃព្រះរាជាណាចក្រកម្ពុជានិងមជ្ឈមណ្ឌលស្រាវជ្រាវច្បាប់អាស៊ាន-ចិន នៅទីក្រុងឆុងឈីង ប្រទេសចិន។ តាមរយៈអនុស្សរណៈនៃការយោគយល់នេះ ភាគីទាំងពីរនឹងបង្កើនកិច្ចសហប្រតិបត្តិការលើការផ្តល់ប្រឹក្សាយោបល់ផ្នែកច្បាប់រវាងគ្នាទៅវិញទៅមក ក៏ដូចជារៀបចំឱ្យមានការបណ្តុះបណ្តាលច្បាប់ ដោយធ្វើការផ្លាស់ប្តូរបទពិសោធន៍ តាមរយៈអ្នកជំនាញរបស់ស្ថាប័នទាំងពីរ។ បន្ថែមពីនេះទៅទៀត សមាជិកគណៈមេធាវីនៃព្រះរាជាណាចក្រកម្ពុជា នឹងមានឱកាសទទួលបានអាហារូបករណ៍ដើម្បីបន្តការសិក្សាថ្នាក់បរិញ្ញាបត្រជាន់ខ្ពស់ និងថ្នាក់បណ្ឌិត នៅសាកលវិទ្យាល័យនីតិសាស្ត្រ និងនយោបាយភាគនិរតី តាមរយៈអនុស្សរណៈនៃការយោគយល់នេះផងដែរ។ ជាកិច្ចបញ្ចប់នៃកម្មវិធី ប្រតិភូគណៈមេធាវីនៃព្រះរាជាណាចក្រកម្ពុជា ក៏បានចូលរួមពិធីលៀងសាយភោជន៍ ដែលត្រូវបានរៀបចំឡើងដោយមជ្ឈមណ្ឌលស្រាវជ្រាវច្បាប់អាស៊ាន-ចិន ដើម្បីទទួលប្រតិភូដែលចូលរួមវេទិកាសហប្រតិបត្តិការច្បាប់ចិន-អាស៊ាន លើកទី៧ (The 7th China-ASEAN Legal Cooperation Forum) ផងដែរ។

• Prev
• Next